SWAK: Ang daming nag-react sa mga ipinu-post ni Alden Richards na naka-topless at may pa-abs pa itong ipinakikita.
Siya kasi ang bagong endorser ng Century Tuna Superbods kasama si Nadine Lustre.
Kaya naman kinarir din niya ang mag-gym at magpapayat para bagay na bagay naman siyang mag-endorse ng naturang produkto.
Pero bukod diyan, sisimula na rin ni Alden ang bagong programa niya sa GMA 7 na Centerstage, isang musical reality show tampok ang mga batang magagaling kumanta.
SANYA NA-PRANING SA CORONAVIRUS
SEE: Isa si Sanya Lopez sa napa-praning sa tumitinding isyu sa Novel Coronavirus 2019.
Maingat daw siya ngayon at halos limang beses daw siyang naliligo kapag galing siya sa labas.
“Nakakapraning naman po talaga. Lalo na po ngayon because of social media. Pero importante po talaga na alagaan po natin ang sarili natin.
“Iba pa rin po talaga ang nag-iingat eh,” pakli ng Kapuso sexy actress.
Kahit nga raw sa mall shows nila o sa regional shows, medyo praning na rin daw ang mga guard at handlers nila dahil binabawalan na raw silang lumapit sa fans.
Posible kasing mahahawa ka sa crowded na lugar.
“Pag nagmu-mall show po ako ngayon… before po kasi pinapayagan pa kami bumaba. Pero ngayon, kahit anong pilit ko ayaw po talaga kami payagan. Pero ‘yung pinupuntahan na rin kasi namin naka-mask na rin lahat.
“Siyempre, ‘yung mga hawak-hawak sa kamay… pero humahawak pa rin ako minsan, hindi po talaga maiwasan. Pero kailangan po talaga maghugas ng kamay at mag-alcohol,” pahayag ni Sanya nang nakatsikahan namin noong Lunes sa story conference ng bagong programa niyang Agimat ng Agila kasama si Sen. Bong Revilla.
DUMADAMI ANG SUMUSUPORTA KAY MARCELITO POMOY
SWAK: Ngayong pasok na si Marcelito Pomoy sa grand finals ng America’s Got Talent, lalong dumadami ang sumusuporta sa kanya. Kaya patuloy lang din ang pakiusap niya sa ating mga kababayan sa Amerika na sana tulungan siya sa mga boto para mapanalunan niya ito.
Pero laging sinasabi ni Marcelito na hindi niya ito narating kung wala ang asawa niyang nag-push na sumali siya sa AGT.
“Nagpapasalamat siguro talaga ako sa asawa ko kasi siya ang gumawa ng way eh.
“Ako nawalan noon ng pag-asa, siya ang talagang nagtayo. Sabi niya, ‘hindi, kaya mo pa ‘yan. May boses ka pa, ako ang gagawa ng paraan.
“Umiiyak talaga ko nun eh,” pahayag ni Marcelito.
Kaya kung wala raw ang asawa niya, hindi naman daw niya ito maabot.
Thankful din siya sa mga biyenan niya dahil todo rin daw ang suporta sa kanya.
Minsan nga raw parang pakiramdam niya mas mahal pa siya ng mga biyenan niya kesa asawa niya.
Kaya, patuloy raw niyang idinadasal sa Diyos at nagpapasalamat sa pamilya at sa asawa niyang ibinigay sa kanya.
AKTRES OA SA PAGKASELAN
SEE: Hindi pa raw nauuso noon ang Novel Coronavirus, OA na raw sa pagkaselan itong si kilalang aktres na balak na ring magpakasal sa kanyang boyfriend.
Sinasabihan na kasi ngayon na medyo iwas na sa pagbeso-beso.
Pero noon pa man, itong si aktres ay talagang namimili na raw ng binebeso niya.
The height ng ginagawa niya, kapag pumapasok daw ito sa isang bahay o building, hindi raw ito humahawak sa door knob para buksan ang pinto.
Marami na raw ang nakapansin sa kanya na tumatakbo ang alalay nito para pagbuksan siya ng pinto, dahil hindi raw ito humahawak ng door knob.
Ganoon kaarte at kaselan itong si kilalang aktres at ang dami pang kuwento tungkol sa kanya.
196
